公民黨：輸議席都唔輸黨格
【明報專訊】港珠澳大橋、外傭居港權兩單官司，令公民黨元氣大傷，甚至成為區議會選舉上被對手攻擊嘅焦點。噚日公民黨舉行「企硬」大會，表明就算輸議席，都唔可以輸黨格，強調喺人權、法治、民主等問題都會企硬，連創黨主席關信基都講到黨友真係上戰場打仗一樣，話戰爭總要犧牲，呢場選舉就小人當道、妖魔橫行，但呼籲黨友要做「勇敢嘅大衛」。
「左執人權 右持法治」
不過，每個黨友似乎都做好輸嘅準備，好似港珠澳大橋朱婆婆嘅代表律師黃鶴鳴，發言時就強調公民黨輸得起選舉，但香港輸唔起原則，有候選人更加話，喺區度畀人叫做「黑社會黨」，但事實上佢哋唔係「左青龍右白虎」，而係「左執人權，右持法治」。搞到喺第一城出選嘅湯家驊，就忍唔住批評個黨講得太多「輸」，但佢就覺得公民黨已經贏咗尊重、對手恐慌，仲話「贏議席係錦上添花」。
黨魁梁家傑就話，近日被人不斷打擊、抹黑，甚至比23條立法時有過之而無不及，證明公民黨係做得啱、有料，先會畀抹黑喎。
黃鶴鳴喺黃大仙天強出選，對手係自由黨陳安泰。湯家驊嘅對手係現任區議員黃嘉榮。
http://orientaldaily.on.cc/cnt/news/20110816/00176_015.html
