馮檢基惹fb睇鹹片疑雲 稱戶口疑遭盜用大整蠱
明報 – 16小時前
【明報專訊】民協立法會議員馮檢基睇「色情短片」被網友發現？有眼利嘅網友喺阿基嘅社交網頁facebook發現一則「最新動態」，顯示阿基喺「點一點 讚短片」度「觀看」咗兩段短片，片名「日本口罩女生的自拍表演」同「勃起」，惹人遐想。
有「好心」網友撐阿基，話件事應該係管理員嘅錯，亦有人「幸災樂禍」，叫阿基「報紙見」。阿基噚日急急澄清，話戶口懷疑畀人盜用，佢同啲同事都無睇過條片㗎。
曾整個戶口蒸發
阿基噚日同Emily 講，佢嘅facebook由4名辦公室職員共同管理，佢問過晒所有人，都話無睇過嗰個網，佢已經即時更改戶口密碼同刪除連結，費事傳播病毒。阿基話，今次唔係第一次懷疑畀人盜用fb，之前試過成個戶口消失咗，唔見咗幾千個「朋友」，認真麻煩。
阿基噚日亦喺fb留言解釋事件，話好感謝大家咁關心佢，如果對大家造成不便，佢謹此致歉。
兩片「有味」但非鹹
雖然片名有啲鹹片feel，但Emily上網睇過兩條片，發現都「無料到」，只係一個女仔對住鏡頭，好似啦啦隊咁跳跳紮4分幾鐘，另一條片就有啲有味動作，但嚴格嚟講唔係鹹片，阿基你唔使咁驚喎！
